Yn achos busnesau a chyrff preifat bydd y Cynllun Hunaniaeth Cenedlaethol yn:
Bydd hyn yn golygu, er enghraifft, y gellir diogelu cytundebau morgeisi neu fenthyciadau yn well ac y bydd yn haws i werthwyr ffoniau symudol wirio pwy sy'n gwneud contractau. (Astudiaeth achos sy’n dangos y fantais hon.) Rhoddir 'cyfeirif trafod' i gyrff bob tro y byddant yn gwirio pwy yw cwsmer fel y gallant gadw cofnod archwilio.
Bydd y cynllun yn helpu cyflogwyr yn gyffredinol i ddilysu gweithwyr newydd er mwyn sicrhau eu bod pwy maent yn honni bod. Yn achos rhai swyddi mae'n bwysig gwirio nad oes gan yr ymgeisydd gofnod trosedd, er enghraifft. Yn y dyfodol gellir gwneud hyn trwy ddefnyddio eu Cyfeirif Adnabod (IRN) i wirio cofnodion yr heddlu. Hefyd, am fod rhaid i wladolion tramor sy'n aros yn y DU am ragor na thri mis gofrestru gyda'r Cynllun Hunaniaeth Cenedlaethol, bydd yn hawdd i ddarpar gyflogwyr wirio eu statws cyflogaeth.
Bydd cyrff yn cael dewis y dull dilysu mwyaf addas i'r achos. Gall hyn fod mor syml ag edrych ar y llun ar y cerdyn adnabod i weld a yw'r un peth â deiliad y cerdyn. Mewn trafodion lle mae angen lefel uchel o ddiogelwch, bydd yn bosibl gwirio biometreg neu wybodaeth hysbys arall dros y ffôn neu ar-lein.
Mae ar lawer o fusnesau angen ffordd ddiogel i ganiatáu i weithwyr a phartneriaid busnes fynd i adeiladau neu fannau dan warchodaeth neu gael mynediad i gyfleusterau neu ddogfennau. Gallai'r cerdyn adnabod ddarparu system gyffredinol i reoli mynediad am gost isel.
