Cyhoeddwyd y ffioedd am yr eBasport biometrig, y pasport mwyaf diogel i gael ei gynhyrchu yn y DU erioed, heddiw, wrth i’r Gwasanaeth Hunaniaeth a Phasportau (IPS) ddatgan bod dros filiwn o eBasportau wedi cael eu rhyddhau erbyn hyn.
Daw’r ffioedd newydd i rym o 5 Hydref 2006. Dyma ddiwedd cynnydd ffioedd mewn dau gam er mwyn caniatáu cyflwyno’r pasport diweddaraf yn unol â safonau rhyngwladol yn ogystal â mesurau eraill i atal twyll megis gwiriadau cefndir gwell ar ymgeiswyr a pharatoadau ar gyfer cyfweliadau wyneb-yn-wyneb yn achos ymgeiswyr am basportau oedolion am y tro cyntaf.
Meddai Gweinidog y Swyddfa Gartref, Joan Ryan:
"Rhyddhawyd dros filiwn o eBasportau Prydeinig biometrig erbyn hyn, ac o ddiwedd yr haf hwn bydd pob pasport Prydeinig newydd yn eBasport, yn cynnwys sglodyn diogel sy’n storio manylion personol y deiliad a sgan o’u llun, yn ogystal â nodweddion diogelwch amgenach eraill. Mae hyn yn golygu gwell diogelwch a sicrwydd i’r deiliaid ac mae’n unol â safonau y cytunwyd arnynt yn rhyngwladol gyda’r nod o atal bygythiad cynyddol twyll a ffugio.
"Telir am gynhyrchu pasportau trwy’r ffi am basportau. Mae’r mesurau i atal twyll sy’n cael eu cyflwyno gennym yn costio, ond rydym yn bendant mai dyma bris y mae’n rhaid ei dalu er mwyn diogelu cyfanrwydd ein dogfennau teithio a gwella diogelwch ein ffiniau.
" Rydym yn benderfynol y bydd y Pasport Prydeinig yn dal i fod yn un o’r rhai mwyaf diogel yn y byd, ac yn ddogfen y gall teithwyr Prydeinig ddibynnu arni lle bynnag y byddant yn mynd."
Bydd eBasport oedolyn 10-mlynedd safonol yn costio £66 o 5 Hydref. Mae hyn yn cymharu’n rhesymol â’r ffioedd cyfatebol dros ddeng mlynedd am eBasportau mewn gwledydd eraill (Awstralia £72, Gwlad Belg £96, Ffrainc £41, Ynys yr Iâ £81, Siapan £163, Seland Newydd £123, Norwy £87, Y Swistir £219, UDA £54). Mae’r DU yn un o ddeugain o wledydd sy’n defnyddio eBasportau. O fis Hydref bydd cynhyrchu eBasportau’n ofynnol mewn gwledydd sydd am aros yng Nghynllun Hepgor Fisâu UDA.
Yn cael eu cyhoeddi heddiw hefyd mae Adroddiad Blynyddol a Chyfrifon cyntaf Gwasanaeth Pasportau’r DU, a unodd ar 1 Ebrill 2006 â Rhaglen Cardiau Adnabod y Swyddfa Gartref i ffurfio IPS.
Meddai Bernard Herdan, Cyfarwyddwr Gweithredol Darparu Gwasanaethau IPS a chyn Brif Gyfarwyddwr UKPS:
"Mae’r Adroddiad Blynyddol hwn yn sôn am flwyddyn lwyddiannus iawn arall i’r UKPS. Ar yr un pryd â gweithredu mentrau o bwys i atal twyll, wrth brosesu ceisiadau am basportau, ymdriniodd yr Asiantaeth â’r galw mwyaf erioed tra’n cynnal gwasanaeth rhagorol i gwsmeriaid.
"Llwyddodd yr Asiantaeth i gyrraedd ei tharged o drafod gwaith mewn deg diwrnod ynghyd â thargedau allweddol eraill o ran gwasanaeth cwsmeriaid, ac am y drydedd flwyddyn yn olynol daeth ar frig Arolwg Bodlonrwydd Comparisat, gan ragori ar fusnesau eraill megis Amazon, Asda, eBay, Marks and Spencer, a Tesco.
"Mae perfformiad da UKPS wedi creu man cychwyn ardderchog ar gyfer y gwaith y bydd IPS yn ei wneud dros y blynyddoedd sydd i ddod."
Y ffioedd newydd am basportau a fydd mewn grym o 5 Hydref (ffioedd cyfredol mewn cromfachau):
| Trwy’r Post | Gwasanaeth Cyflym | Premiwm | |
| Oedolyn | £66 (£51) | £91 (£77.50) | £108 (£96.50) |
| Plentyn | £45 (£34) | £80 (£70) | £93 (£83) |
NODIADAU I OLYGYDDION
Monday 24th July 2006
Llinell Gyngor ar Basportau 24 awr: 0870 521 0410 (gweler telerau ac amodau).
Codir tal o 8c y funud am alwadau o linell ddaear BT ac atebir pob galwad gan weithwyr byw
Datganiad
preifatrwydd
| Telerau ac amodau | Rhyddid Gwybodaeth | Hygyrchedd |
© Crown copyright 1995 – 2006, Cedwir
pob hawl. Cydnabyddir pob nod masnach.
